OTON, ILOILO – Nagpabutyag sang hibibun-ot ang isa ka bana may kaangtanan sa disriminasyon nga naeksperyensyahan matapos nagpositibo sa Coronavius Disease 2019 (COVID-19) ang nagabusong nga tiayon.
Sa interview sang Bombo Radyo kay Niño Picarra sang Oton, Iloilo, iya ginpahayag nga regular nga nagapa check-up ang iya asawa sa district hospital sa Guimbal apang bilang protocol, kinahanglan ang negatibo nga COVID-19 test result antes makasulod.
Suno kay Picarra, nagpaidalom sa COVID-19 test ang iya tiayon tubtub nakumpirma nga nagpositibo ini sa virus.
Ginpahayag ni Picarra nga ang iya tiayon ang gindala sa quarantine facility sang banwa samtang siya ang ginpaidalom lang sa strict home quarantine.
Pagkasunod nga adlaw suno kay Picarra, nakita niya ang Facebook post sang iya kasilingan nga nagapahayag nga may yara sang COVID-19 positive sa ila barangay.
Magluwas diri, nakita man sang natungdan nga may balde na nga ginahakwat ang ila kasilingan kag ginbasyahan sang disinfectant ang ila balay.
Gin-athag sang natungdan nga wala sang problema sa iya nga i-disinfect ang ila balay apang kun tani sa maayo lang nga paagi.
