Ginkasuhan ang American star rapper kag entrepreneur nga si Jay-Z bangud sa gin-alegar nga pag-rape sa 13-anyos nga babaye sang 2000 kaupod sa hip-hop artist nga si Sean “Diddy” Combs.
Ini nga hip-hop megastar, 55, ang kilala bilang si “Shawn Carter” sa matuod nga pangalan kag kasado sa music superstar nga si Beyonce. May yara sila sang tatlo ka mga bata.
Anonymous ang nag-akusar ukon gin-identify lamang bilang si “Jane Doe.” Base sa iya statement, natabo ang pagpanghimulos matapos nga gindala ini sa after-party sang MTV Video Music Awards sa Manhattan, New York.
Una na nga na-file ini nga federal lawsuit sang Oktubre, 2024 sa Southern District of New York kun sa diin si Sean ang defendant, apang gin-file ini liwat subong kag ginlakip na si Jay-Z sa gin-akusaran.
Base sa statement sang nag-akusar, sa natabo nga house party, ginhatagan siya sang ilimnon kag gilayon nga naglingin ang iya ulo rason nga nagkadto siya sa hulot agud magpahuway.
Ginpahayag sini nga nagsulod man si Sean kag si Jay-Z sa hulot, kag si Jay-Z mismo ang una nga nag-rape sa iya samtang nagalantaw si Sean kag ang isa ka female celebrity nga gin-identify bilang si ‘Celebrity B.’ Pagkatapos suno sa iya, si Sean naman ang nagbulos sa pagpahimulos sa iya kag nagalantaw man gihapon ang babaye.
Ginpahayag sa statement sang nag-akusar nga nagasuprer ini gihapon sang post-traumatic stress disorder kag depression bilang resulta sang ginaalegar nga pag-rape sa iya.
Gilayon nga nagpaguwa sang statement si Jay-Z kag gintawag ini nga “idiotic” kag isa ka “blackmail attempt”.
“These allegations are so heinous in nature that I implore you to file a criminal complaint, not a civil one!! Whomever would commit such a crime against a minor should be locked away, would you not agree?” kabahin sang statement. “These alleged victims would deserve real justice if that were the case.”
“My only heartbreak is for my family,” dugang sini. “My wife and I will have to sit our children down, one of whom is at the age where her friends will surely see the press and ask questions about the nature of these claims, and explain the cruelty and greed of people. I mourn yet another loss of innocence.
“Only your network of conspiracy theorists, fake physics, will believe the idiotic claims you have levied against me that, if not for the seriousness surrounding harm to kids, would be laughable,” pahayag pa sini.
Nahibaluan nga antes sini, una na nga nangatubang si Sean sang kaso nga racketeering, sex trafficking kag iban pa nga kaso kag yara subong sa Metropolitan Detention Center sa Brooklyn. Tatlo ka beses siya nga wala ginpa-pyansa kag naka-schedule ang trial sa Mayo 5, 2025.
Sa court hearing sang nagligad nga bulan, ginpahayag sang prosecutors nga posible madugangan pa gid ang potensyal nga kaso batok kay Sean.#
