Naka-recover na ang banana exports sang Pilipinas bangud sa mas madamo nga shipments sang 2023.
Ini ang nagtapos sang apat ka tuig gid nga pagsarurot sang exports kun sa diin isa sa ginalantaw nga rason amo ang mga produkto nga apektado sang Panama disease.
Suno sa data sang Philippine Statistics Authority (PSA), naka-export ang Pilipinas sang 2.354 million metric tons sang fresh bananas sang 2023 nga 3.5 percent nga mas mataas ipaanggid sa 2.275 million MT nga napaguwa sang 2022.
Kun balor naman ang paga-isipon, naka-rekord man ang Pilipinas sang three-year high export receipt sang 2023 kun sa diin naglab-ot ini sa $1.22 billion nga 11 percent nga mas mataas sa $1.097 billion sang 2022.
Lakip sa ginpasalamatan sang Pilipino Banana Growers and Exporters Association (PBGEA) sa recovery sang exports amo ang padayon nga rehabilitasyon sang mga uma nga apektado anay sang Panama disease.
Ang ginatan-aw naman subong nga makaapekto sa produksyon kag sa exports amo ang natabo nga pagbaha sa Mindanao kun sa diin indi maayo ang operasyon sang pila ka mga plantasyon sa rehiyon.
“Fingers crossed that despite the flooding, we will still produce more than what we produced in 2023 by continuously rehabilitating (areas) and containing the further spread of Panama disease,” suno kay PBGEA executive director Stephen Antig.
Nagakahangawa man ang banana industry nga buslan na sang Guatemala ang Pilipinas bilang ikaduha nga pinakadaku nga banana exporters sa kalibutan.
Nahibaluan nga base sa 2023 banana market review sang Food and Agriculture Organizations sang United Nations, nagapangaduha ang Pilipinas sa Ecuador sa pinakadaku nga exporter sang saging sa bilog nga kalibutan samtang nagapang-tatlo naman ang Guatemala.
Kun sa Asya lamang ang pagahambalan, ang Pilipinas amo ang top exporter kun sa diin ang mga ka-kumpetisyon sini nga banana producers amo ang Vietnam, Cambodia kag India.#
