Tuman gid ang paghalong nga aton ginahimo para sa mga patay.
Ini bilang pagpakita man sang pagtahod sa tawo nga wala na sang kabuhi kag pagpakita man sang pag-unong sa iya pamilya nga puno sang kalisod.
Apang may mga amo man sini nga insidente nga wala gid nagakalikawan kag indi gid dayon madali-dali nga malipatan.
Isa ka motorista ang nakibot sang may nakit-an ini nga lawas sang tawo sa tunga sang karsada sa Stalowa Wola nga isa ka syudad sa southeastern Poland.
Tuman ang kakulba sini sa pagdumdom nga siya ang nakabunggo sa lalaki kag nadulaan ini sang pangalibutan sa tunga sang dalan.
Sang ulihi, naglapta na ang pictures sa social media nga nagahigda ang bangkay sa white striped pedestrian crossing matapos ini nahulog gali sa salakyan sang punerarya!
Gilayon nga nagpaguwa sang statement ang Hades Funeral Services kun sa diin gin-ako sini ang responsibilidad sa natabo nga insidente.
Ginbasol man sini ang unexpected technical failure sa electric tailgate lock sa autofunebre rason nga samtang nagabyahe, nahulog ang bangkay samtang pakadto-pakari man ang iban nga mga salakyan.
Ginsiling sang kumpaniya nga wala ini nakaabot sa high standards sang ila serbisyo kag tuman gid ang ila pag-sorry sa pamilya sang napatay.
Nagpangayo man ini sang pasensya sa tanan nga nakakita sang picture sang bangkay kag sa mga dismayado sa natabo nga insidente.
“It is with deep regret that we inform you that as a result of an unexpected technical failure of the electric tailgate lock in the hearse, during the transport of the body of the deceased, an unfortunate event occurred which does not reflect the high standards of our company, our deep empathy towards the families of the deceased, and the respect we always show to the deceased,” kabahin sang statement sang kumpaniya sa ila website.#
