Ginpaidalum na sa autopsy subong nga adlaw, Hulyo 1, 2025, ang bangkay ni Robert Garcia, 45 anyos, residente sang Brgy. Danao, Tigbauan, Iloilo, nga nasapwan nga wala na sang kabuhi sa Brgy. Bugasongan sa amo man nga banwa kahapon, Hunyo 30.
Base sa inisyal nga imbestigasyon sang mga kapulisan, nag-agum ini sang lagob sa liog tubtob sa dughan, nga ginapatihan nga ginkastigo rason sang iya kamatayon.
Sa interview sang Bombo Radyo kay PCpt. Alfred Mansoy, hepe sang Tigbauan Municipal Police Station, iya ginpahayag nga may 8 ka ‘persons of interest’ sa kaso, kag tatlo na sa ila ang yara na subong sa kustodiya sang otoridad.
Sa imbestigasyon sang mga kapulisan, may yara sang duha ka bersyon sang istorya nga naguwa halin sa mga saksi.
Ang una nga bersiyon amo ang iya ni Rodgie Garcia nga pakaisa sang biktima, kun sa diin ginsiling niya nga ginkastigo ang biktima sang pila ka mga persona sa namatyan kung sa diin sila nagkadto nga duwa.
Sang pauli na sila kag ginaagubay niya ang iya pakaisa, ginbilin niya ang biktima bangud indi na niya ini masarangan nga buligan.
Pagkaaga, nasapwan ang biktima nga wala na sang kabuhi sa lugar kun sa diin niy ini ginbilin.
Apang sa bersyon naman ni Alyas Nonoy, bata sang ginahaya sa namatyan, iya ginpahayag nga ang biktima kag iya upod ang yara sa impluwensya sang makahulubog nga ilimnon sang sila nagkadto sa namatyan kag nagpanghangkat sang away ang biktima nga may ginnataklos pa nga kutsilyo.
Dugang pa niya, matawhay nila nga gin-istorya kag ginpapauli ang biktima para malikawan ang gamo.
Samtang, ginpahayag naman ni Mansoy nga kun mapamatud-an nga ginpatay ang biktima, magapasaka sang kaso ang pamilya.
Sa subong, ginahulat na lang ang resulta sang autopsy agud mahibaluan ang matuod nga rason sang kamatayon sang biktima.
