Padayon nga gina-imbestigaran sang Iloilo City Police Station (ICPS) 1 ang bangkay nga nasapwan sa bahin sang Parola Wharf sang highlights sang Dinagyang Festival.
Ang nasapwan amo si Angelo Brandon Salazar, may live-in partner, may duha ka mga kabataan kag residente sang Barangay 2, San Jose, Antique.
Sa interview sang Bombo Radyo kay PLt. Romel Tabuyoc, Hepe sang ICPS 1, iya ginpahayag nga naghalin ini sa ila nga puluy-an sang Enero 22, 2025 apang wala matul-id kun ano ang transaksyon sini.
Base sa inisyal na imbestigasyon, nakaagum ini sang pilas sa iya ulo, patimaan nga ginlampusan ini sang matig-a nga bagay.
Ginalantaw nga anggulo sang kapulisan nga posible ini nga isa ka drug-related case, apang padayon pa ini nga ginakumpirma sang kapulisan sa bahin sa Probinsya sang Antique.
