Yara na sa state of decomposition ang bangkay sang lalaki sang masapwan sang iya pamilya sa Brgy. Bayan, Passi City.
Ang biktima amo si Alyas Banong, 39-anyos, laborer, kag residente sang nasambit nga lugar.
Sa interview sang Bombo Radyo kay Police Captain Maria Rosario Miranda, Public Information Officer sang Passi City Police Station, iya ginpahayag nga nakita sang iya iloy ang biktima malapit sa iya puluy-an nga nagakulob nga may pilas sa likod, ulo, kag may nakahigot nga shoe lace sa iya liog.
Pahayag sang iloy sang biktima, ulihi sini nga nakita ang iya anak sang Domingo nga adlaw sang nagtulog sa ila balay kag naglisensya ini nga mapauli kag mabalik lang ugaling para magkuha sang bugas. Wala na ini makabalik rason nga ginkadtuan ini sang iya iloy.
Wala nakasugid ang pamilya kun may kontra ang biktima apang ginpahayag nga masabad ini kun makainom.
May ginasundan na subong nga person of interest ang kapulisan bangud may nakakita sa amo nga indibidwal sa lugar antes pa masapwan ang biktima.
Nagpabutyag naman ang pamilya nga ipa-autopsy ang bangkay sang ila himata.
(Article: Bombo Phauline Pillora)
