ILOILO CITY – Ipaidalom sa cremation ang bangkay ni anay Local Water Utilities Administration Head Lorenzo “Larry” Jamora matapos nagtaliwan subong nga adlaw, Hulyo 31, sa edad nga 73 anyos bangud sa Pancreatic cancer.
Sa interview sang Bombo Radyo kay Martin Jamora, kamagulangan nga anak sang nagtaliwan nga anay Local Water Utilities Administration Head, iya ginpahayag nga pagkatapos sang cremation, pagadal-on anay sa ila balay ang abo sang iya amay.
Suno kay Jamora, may yara sang public viewing nga patigayunon sa Sto. Niño Mission Chapel sa Delgado St., Iloilo City umpisa buwas nga adlaw, Agosto 1.
Ginpahayag ni Jamora nga wala pa sang final schedule kun ano ka dugay ang public viewing apang mahimo nga makabisita sa nasambit nga chapel umpisa 12:00 sa udto tubtub 7:00 sa gab-i.
Una diri, na-diagnose nga may Stage 3 Pancreatic cancer ang anay mayoralty candidate sa syudad sang Iloilo sang Agosto 2019.
