Nakapauli na kagab-i, Enero 19, ang bangkay sang Ilongga overseas Filipino worker (OFW) nga si Mary Jill Dela Cerna Muya, nga napatay sa Abu Dhabi, United Arab Emirates (UAE).
Tuman ang pagpasalamat sang pamilya Muya bangud, suno sa ila, wala gid sila maglaom nga mangin madali ang pagdala pauli sang bangkay sang ila himata.
Sa interview sang Bombo Radyo sa iya utod nga si Michelle Muya Santos, iya ginpahayag nga nasubuan sila sa natabo kay Mary Jill, apang nalipay man bangud “makapahuway na ini sang insakto” matapos nga na-repatriate pauli sa iya pamilya.
Sandig sa impormasyon sang pamilya, ginapahayag nga gin-utas ni Muya ang iya kaugalingon nga kabuhi. Nasapwan siya nga wala na sang kabuhi sa iya ginatiniran nga hulot sa Abu Dhabi, UAE.
Tumandok sang Jaro, Iloilo City si Muya kag ginabanta duha ka dekada na ini nga naga-trabaho sa luwas sang pungsod.
Pahayag sang pamilya, nag-umpisa sila nga matingala sa sitwasyon sini matapos nga wala ini nakapangamusta ukon nakapanamyaw sa iya anak sa tion sang Pasko.
Matandaan nga nagdangop ang pamilya sa Bombo Radyo kag nagpanawagan sang bulig agud madala na pauli ang bangkay ni Mary Jill.
Nagpasalamat nama ini sa Bombo, sa OWWA amo man kay Iloilo City Lone District Representative Julienne “Jamjam” Baronda nga natigayon madala pauli ang bangkay ni Mary Jill sa Iloilo.
