ILOILO CITY – Isa ka gab-i lang nga ihaya sa Kampo Delgado ang bangkay ni Ret. Gen. kag Philippine Charity Sweepstakes Office Board Sec. Wesley Barayuga.
Sa interview sang Bombo Radyo kay Police Col. Gilbert Gorero, tagpamaba sang Police Regional Office 6, Agosto 2 sang kaagahon sang nag-abot sa syudad sang Iloilo sakay sa eroplano ang bangkay ni Barayuga apang antes gindala sa Kampo Delgado, ginderetso ini anay sa St. Peter Chapels Iloilo kag ginpailisan sang PNP uniform santo sa hingyo sang pamilya.
Pagkatapos sini, gilayon nga gindala sa Kampo Delgado ang bangkay ni Barayuga kag ginhatagan sang honors arrive apang ginsunod ang minimum health protocols.
Ginpahayag ni Gorero nga 24 oras lang nga igahaya si Barayuga sa Kampo Delgado antes dal-on balik sa St. Peter Chapels Iloilo apang wala pa nakahatag sang petsa ang pamilya kun san-o igalubong ang anay PNP official.
Nahibalu-an nga si Barayuga ang ginluthang-patay sang wala pa makilala nga motorcycle-riding suspek samtang sakay sa pick-up government vehicle sa Mandaluyong City.
Ang driver naman nga si Jun Gunao ang nagapabilin sa hospital matapos nasalabat sa insidente.
