Ginkumpirma sang tag-iya sang A. Sumagpao Funeral Service & Cemetery sa Santa Barbara, Iloilo nga yara na sa Gegato-Abecia Funeral Parlor and Crematorium sa Iloilo City ang bangkay sang 12 anyos nga bata nga COVID-19 positive.
Sa interview sang Bombo Radyo kay Arnulfo Sumagpao, iya ginpahayag nga sila ang nagkuha sa ospital sa West Visayas State University Medical Center kag yara mismo ang pamilya sang napatay nga bata.
Pagkaaga pa ginpahibalo nga positibo ang bata sa COVID-19 gani nga ginpapili ang pamilya kun ipa-cremate ukon direkta nga ilubong ang bangkay.
Wala nakakadto ang pamilya sa punerarya sa Sta. Barbara bangud na-quarantine sila kag wala naman sang reply ang pamilya sa tag-iya sang punerarya.
Apang pahayag pa ni Sumagpao, indi man mahimo nga matinir ang bangkay sa storage facility sang A. Sumagpao Funeral Service & Cemetery.
Suno kay Sumagpao, gindul-ong nila sa crematorium facility sa Iloilo City bangud may memorandum of agreement (MOA) man sila nga pwede sila makapa-cremate kag makapa-embalsamar.
