Nagasala kag nagalalain ang ginikanan sang 12 anyos nga nagtaliwan bangud sa COVID-19 matapos ginapahayag nangin dulaan ang bangkay sini matapos ginapahayag man nga ginpasa-pasahan sang punerarya sa syudad sang Iloilo.
Sa interview sang Bombo Radyo kay Juvy Geronimo, iloy sang biktima kag nagarenta sang balay sa Barangay Balabago, Jaro, Iloilo City, iya ginpahayag nga humalin sang Agusto 10, nagasaka-panaog na ang hilanat sang iya anak nga ginakabig ‘special child.’
Agusto 15, gindala sa isa ka ospital sa syudad ang 12 anyos apang gindeklara sang doktor nga dead on arrival na ini.
Matapos nagwa ang resulta sang reverse transcription polymerase chain reaction (RT-PCR) test kag natukiban nga nagpositibo sa COVID-19 ang bata, gilayon nga ginpakuha sang ospital ang bangkay sa A.Sumagpao Funeral Service & Cemetery sa Santa Barbara, Iloilo.
Apang suno sa iloy, sa ila ulihe nga pagpakig-angot sa nasambit nga punerarya, ginpahayag sang mga ini nga gindala na lang ang bangkay sang iya anak sa Gegato-Abecia Funeral Parlor and Crematorium.
Wala pa nakumpirmar sang iloy kun sa diin gid man nga punerarya nahamtang ang bangkay sang iya nga anak.
Nahibaluan nga matapos natumod nga mga close contact, padayon subong nga gina-quarantine ang iloy, amay, kag magulang sang biktima sa diin natalana ang mga ini nga ipaidalom sa swab test.
Samtang, ginkumpirma sang Gegato-Abecia Funeral Parlor and Crematorium nga wala sang 12 anyos nga bangkay sa ila nga punerarya.
Sa interview sang Bombo Radyo kay Greg Abecia, tag-iya sang Gegato-Abecia Funeral Parlor and Crematorium, iya ginpahayag nga wala nakapakig-angot sa ila ang A. Sumagpao Funeral Service & Cemetery kag wala man ang mga ini nakadul-ong sang nasambit nga bangkay.
Sa pihak sini, ginpahayag man sang natungdan nga kuntani ginpalubong ukon ginpa-cremate na ang 12 anyos santo sa pagsulundan sang Depertment of the Interior and Local Government (DILG).
Nahibaluan nga sa amo nga pagsulundan, nagakadapat nga ma-cremate ukon mapatigayon ang direct burial — 12 feet below the ground, 12 ka-oras matapos napatay ang isa ka pasyente bangud sa COVID-19.
Samtang, matapos napakig-angutan sang Bombo Radyo Iloilo ang tag-iya sang A. Sumagpao Funeral Service & Cemetery sa Santa Barbara, Iloilo, ila gin-athag kag ginkumpirma nga yara subong sa Gegato-Abecia Funeral Parlor and Crematorium ang bangkay sang 12 anyos nga COVID-19 positive.
