ILOILO CITY – Patay na sang masapwan sa sulod sang bubon ang isa ka babaye sa Barangay Union, Libertad, Antique.
Ginkilala ang biktima nga si Joanne Jones Patricio, 25, residente sang nasambit nga lugar.
Ulihi ini nga nakit-an nga nagapanglaba sa kilid sang bubon antes ini gin-report nga missing.
Suno sa testigo nga si Judy Argalon Meliton, masag-ob ini kuntani sang tubig sang makit-an ang biktima nga nagalutaw sa sulod sang bubon.
Ginkumpirma naman ni Dr. Theresita Escondon, municipal health officer sa nasambit nga banwa, ginkuyap ang biktima kag posible nga nalumos ini sang madagdag sa bubon.
Wala naman sang nakit-an nga foul play sa insidente.