Wala sa gihapon nakilal-an ang bangkay sang babaye nga nasapwan nga nagalutaw sa sapa sa Barangay North San Jose, Molo, sang Hunyo 19, pasado alas-5 sang hapon.
Sa interview sang Bombo Radyo kay Police Captain Ryan Christ Inot, hepe sang Iloilo City Police Station 4, iya nga ginpahayag nga tubtob subong wala pa sa gihapon na-indentify ang bangkay.
Suno kay Inot, may apat na ka pamilya nga naglantaw sang bangkay — tatlo halin sa syudad sang Iloilo kag isa halin sa probinsya sang Zarraga — apang ginkumpirmar nga indi ini ila himata.
Dugang pa ni Inot, ila ginapalapta ang litrato sang bangkay, indi lang sa syudad sang Iloilo kundi pati man sa probinsya.
Base sa imbestigasyon sang ICPS4, indi taga-Molo ang babaye kag posible nga gin-atake sang sakit, nahulog sa sapa, kag gin-anod padulong sa amo nga barangay. Wala man sang pilas ukon senyales nga ginsakit ini antes nalumos.
Ginabanta nga nagapang-edaron sang 60-70 anyos ang biktima nga may 4’11 nga kataason. Sang masapwan ini, nagasuksok siya sang puti nga polka dots t-shirt, pajama nga color yellow kag may ginauyatan nga pula nga panyo.
Sa subong, yara pa gihapon ang bangkay sa Sumagpao Funeral Homes sa Sta. Barbara, kag padayon ang panawagan sang Iloilo City Police Station 4 sa mga pamilya nga posible nadulaan sang himata.
