ILOILO CITY–Nagakadapat nga dulaon na sang pamilya ang mga sala nga pagpati may kaangtanan sa wala naagnas nga bangkay sang duha ka tuig nga bata sa isa ka banwa sa probinsya sang Iloilo.
Sa interview sang Bombo Radyo kay Dr. Owen Lebaquin, medico legal officer sang Police Regional Office (PRO) 6, ginpahayag sini nga delikado kag mahimo mabutang sa risgo ang ikaayong lawas sanga pamilya bangud sa pagdala sang bangkay sang bata sa ila balay.
Sa pagpaathag ni Dr. Lebaquin, un-hygienic ini nga buluhaton kag mahimo nga mangin tunaan ini sang paglapta sang balatian.
Nagagakadapat man suno kay Lebaquin nga sa labing madali nga panahon ikunsulta sa Municipal Health Officer kun ano ang mas maayo nga pagahimuon sang pamilya.
Nagakadapat man suno kay Lebaquin nga asikasuhon ukon ipalubong sa madali nga ti-on ang bangkay sang bata.
Posible naman nga madunot ang bangkay bangud sa exposure sa hangin.