ILOILO CITY – Nakita na ang bangkay sang hubog nga lalaki nga naglumpat kahapon sa taytay sa Brgy. Sta. Rosa, Mandurriao, Iloilo City.
Ang biktima amo si Ramcel John Porral, 30 anyos kag pamilyado.
Sa interview sang Bombo Radyo kay Rolando Sampiano, nakakita sa bangkay, iya ginpahayag nga gilayon siya nga nagpangayo sang bulig sang makita ang bangkay sang biktima nga nagalutaw sa suba.
Sang iya makita suno kay Sampiano, gilayon niya nga nakilala ang biktima nga amo si Ramcel John Porral nga naglumpat sa taytay kahapon nga adlaw.
Suno naman kay Josephine Netumay, tiya ni Porral, iya ginpahayag nga masami nga nagapahubog ang biktima.
Bag-o naglumpat sa taytay kahapon, ginpahayag ni Netumay nga nagpahubog pa ang biktima matapos nga ginpahalin sa trabaho.
Ginpahayag ni Netumay nga ginsunlog pa sang iya mga hinablos ang biktima nga maglumpat sa taytay kabaylo sang sigarilyo kag whisky.
Si Porral ang may tatlo ka anak apang bulag sa asawa.
Samtang, ginpahayag naman ni alyas Jean-Jean, 11, kag anak sang biktima, gin-akigan pa siya sang iya amay kahapon nga adlaw.
Suno kay alyas Jean-Jean nga masami nga nagapahubog ang iya amay.
