ILOILO CITY – Gindala na pauli sa banwa sang Leon, Iloilo ang bangkay sang Ilonggo nga suldado nga napatay sa inaway sa tunga sang militar kag rebelde nga Maute group sa Marawi City.
Ginsakay sa C-130 plane ang bangkay ni Private First Class Anthony Capulot, 25, sang Sitio Tagas, Barangay Ayabang, Leon, Iloilo kag na-assigned sa 15th Infantry Battalion sang Philippine Army.
Ang bangkay sini ang naghalin sa Laguindingan Airport kag ginderetso sa Iloilo International Airport.
Ini ang apo sa tuhod sang Ilonggo nga baganihan nga si Capt. Jose Calugas Sr. nga nakabaton sang Medal of Honor sang World War 2.
Nahibaluan nga ang utod sini nga si Corporal John Peter Capulot ang isa man ka suldado apang na-assign naman sa Negros Occidental.
Si PFC Capulot ang isa lang sa mga suldado nga napatay sa ginamo sa Marawi City.