ILOILO CITY – Bisitahon ni Presidente Rodrigo Duterte ang bangkay sang Ilonggo nga suldalo nga napatay sa engkuwentro sa Bohol sa tunga sang tropa sang gobyerno kag sang Abu Sayyaf.
Sa interview sang Bombo Radyo Iloilo, ginpahayag ni Lt. Col. Erickson Rosana, spokesman sang 3rd Infantry Division sang Philippine Army, magabisita ang Presidente sa haya ni Corporal Mel Jun Cajaban sa Barangay Pandan, Leon, Iloilo apang wala pa sang schedule.
Pero posible suno sa militar nga i-dungan ini sang commander-in-chief sa Dominggo, Abril 23.
Nahibaluan nga magapadulong sa probinsiya sang Antique si Duterte sa Dominggo para sa opening ceremony sang Palarong Pambansa kag mahimo nga i-dungan na lang sang commander-in-chief ang pagbisita sa bangkay ni Cajaban.
Si Corporal Cajaban ang isa sa apat nga katapo sang tropa sang gobyerno nga napatay sa engkuwentro sa Bohol.
Una na ginpahayag ni Ceres Cajaban, iloy sang napatay nga suldado nga sa Abril 29 gintalana ang lubong sang suldado.