Nasapwan ang bangkay sang isa ka pulis nga nagalutaw sa Iloilo River sa Esplanade 1 nga sakop sang Barangay San Rafael, Mandurriao, Iloilo City.
Base sa report sang Iloilo City Police Office (ICPO), patrolman ang ranggo sang biktima, naga-edad sang 28-anyos, kag residente sang Bayawan City, Negros Oriental.
Ginkumpirma man sang Police Regional Office (PRO) VI nga ang amo nga lalaki ang naka-assign sa Regional Communication and Electronics Unit 6 – National Support Unit.
Sa interview sang Bombo Radyo kay Police Captain Val Cambel, hepe sang Iloilo City Police Station 10, iya ginpahayag nga nakit-an sang isa ka lalaki nga naga-jog sa esplanade ang lawas sang personnel pasado alas nueve kaina sang aga.
Indi pa matumod ang rason sang kamatayon sini bangud nagapadayon pa ang imbestigasyon sang Scene of the Crime Operations (SOCO) VI.
