STA. BARBARA, ILOILO – Emosyonal samtang ginasaysay sang iloy kun paano nasapwan ang bangkay sang isa sa duha niya ka mga bata nga nalumos sa Brgy. Talongadian, Sta. Barbara, Iloilo.
Sa interview sang Bombo Radyo kay Elizabeth Sobreviva, iya ginpahayag nga may grupo sang kabataan sa Brgy. Pal-Agon sa nasambit man nga banwa nga amo ang nakasapo sa bangkay sang 5 ka tuig niya nga bata nga si Mary Grace.
Suno kay Sobreviva, ginapahayag nga nagalakat sa higad sang suba ang grupo sang kabataan sang nahulog ang dala nga binangon sang isa ka bata.
Ginpahayag ni Sobreviva nga sang ginkuha na sang bata ang binangon, nakita ang tiil sang iya anak nga si Mary Grace.
Mahimo suno kay Sobreviva nga nakasampay sa puno sang kamonsil ang bangkay sang 5 ka tuig niya nga anak samtang missing sa gihapon ang 12 anyos nga si Modesto.
Nagapasalamat ang natungdan sa tanan nga nagbulig sa search and rescue operation kag apisar sang kabudlay, nagalaum ang iloy nga buhi pa ang isa niya ka anak.
Nahibaluan nga natabo ang insidente sang damlag lang kun sa diin naga-harvest sang talong kag okra ang amay upod ang lima ka niya ka bata.
Ginapahayag nga nadalin-as kag nahulog sa suba si Mary Grace kag gilayon man nga naglukso si Modesto agud salbaron ang iya manghod apang duha sila ang gin-anod sang tubig.
