IGBARAS, ILOILO – Ipaidalom sa autopsy examination ang bangkay sang 38 anyos nga lalaki nga nasapwan-patay sa Sitio Pasong, Brgy. Jovellar, Igbaras ,Iloilo.
Sa interview sang Bombo Radyo kay Police Senior Master Sergeant Confessor Escobañez, imbestigador sang Igbaras Municipal Police Station, iya ginpahayag nga ang biktima ang ginkilala nga si Arnaldo Esteves Estoesta, kasado, sang nasambit nga lugar.
Suno kay Escobañez, kasubong nga wala sang foul play sa kamatayon ni Estoesta apang luyag sang pamilya nga makumpirma nga naghikog ang biktima.
Ginpahayag ni Escobañez nga antes pa man ang insidente, nakitaan na sang pagpalangluya ang biktima kag mahimo nga problema sa pamilya ang rason.
Sang Sabado suno kay Escobañez, nagpamulang pa ang biktima kaupod ang iya amay sa diin nakadaug sang fastest kill ang ila manok.
Ang premyo suno sa natungdan amo ang baka apang ginkwarta na lang sang mag-amay ang ila nadag-an kag natukiban nga wala ginhatagan sang partida ang biktima.
Ginapahayag nga sang Dominggo sang kaagahon, naglakat halin sa ila balay si Estoesta apang nagduda na ang pamilya sang wala na nakabalik ang biktima.
Nakita na lang sang amay nga nagabitay sa puno sang balayong ang biktima.
