ILOILO CITY – Nagapabilin nga unidentified ang bangkay sang lalaki nga nasapwan sa Brgy. Sooc, Arevalo, Iloilo City.
Sa interview sang Bombo Radyo kay Police Major Regina Roquim, hepe sang Arevalo Police Station, iya ginpahayag nga ila naman nga ginlibot ang mga lugar kun sa diin gin report nga nakita ang biktima antes ang insidente apang negatibo ang resulta.
Suno kay Roquim, nagkalain-lain ang pahayag sang mga residente sa lugar rason nga mabudlay ang pagtumod kun ano ang motibo sa krimen.
Ginpahayag ni Roquim nga wala nakuhaan sang Closed Circuit Television camera ang pagluthang-patay sa biktima.
Nagapanawagan naman ang natungdan sa kun sin-o man ang nadulaan sang himata nga magpakig-angot lang sa ila para sa dugang nga detalye.
Ang bangkay ang nakasuksok sang duag pula nga shorts, midnight blue nga T-shirt, wala sang tsinelas, may ginasuksok nga hooded jacket, ginabanta naga-edad sang 25-30 anyos, chobby kag moreno.
Samtang, indi naman matumod sang Iloilo City Police Office kun bala may yara sang kaangtanan ang shooting incident sa distrito sang Jaro kag Arevalo.
Suno kay Police Captain Shella Mae Sangrines, tagpamaba sang Iloilo City Police Office, iya ginpahayag nga tuman kalayo nga may yara sang koneksyon ang pagpatay sa duha ka biktima.
Ini bangud nga suno kay Sangrines, wala sang ebidensya nga makapamatuod sa nasambit nga pahayag.
Sa subong, ginapanawagan sang natungdan sa tanan nga may ihibalo nga magpakig-angot sa Iloilo City Police Office agud nga makabulig sa imbestigasyon.
