ILOILO CITY – Igapaidalom gilayon sa cremation ang bangkay sang magataliwan nga Person Under Monitoring ukon Person Under Investigation bangud sa Coronavirus Disease 2019 (COVID-19).
Sa interview sang Bombo Radyo kay Dr. Mary Jane Juanico, pinuno sang Infectious Disease Section sang Department of Health 6, iya ginpahayag nga existing protocol na sang ahensya nga sa tion nga may magtaliwan nga pasyente nga may yara sang infectious disease kasubong sang Human Immunodeficiency Viruses, Sever Acute Respiratory Syndrome kag COVID-19, igapaidalom sa cremation ang bangkay.
Suno kay Juanico, ginadumili-an man ang pagpatigayon sang public viewing sa bangkay sang pasyente nga may yara sang infectious disease nga madali nga maglaton.
Ginpahayag ni Juanico nga ang Local Government Unit na ang magabayad sa pagpa cremate sang bangkay sang magataliwan nga COVID-19 patient.
Suno naman kay Iloilo City Mayor Jerry Treñas, may yara na sang kasugtanan ang Iloilo City Government kag ang Gegato-Abecia Funeral Homes and Crematory Inc. tuhoy sa pag cremate sang bangkay sang COVID-19 patient.
Ginpahayag ni Treñas nga ang nasambit nga funeral home ang otorisado nga mag-cremate sa bangkay sa tion nga may COVID-19 patients sa syudad sang Iloilo nga ginbawian sang kabuhi.
Ang Iloilo City Government na suno sa alkalde ang magabayad sa tanan nga funeral expenses sang COVID-19 patients.
Sa pinakaulihi nga data, naglab-ot sa 55 ang Persons Under Investigation, 2,216 ang Persons Under Monitoring kag isa ang COVID-19 positive sa syudad sang Iloilo.
