ILOILO – Wala pa sang indentity ang bangkay sang ginapatihan miyembro sang New People’ Army nga nasapwan sa Brgy. Ongyod, Miag-ao, Iloilo.
Ini ang kasunod sang ika-duha nga engkwentro nga nagluntad sa nasambit nga lugar.
Sa interview sang Bombo Radyo kay Lt. Col. Joel Benedict Batara, commanding officer sang 61st Infantry Batallion sang Philippine Army, iya ginpahayag nga ginabanta nga 16 tubtub 18 anyos ang edad sang bangkay sang lalaki nga nakita sa encounter site.
Nakuha man sa lugar ang M16 rifle, mga dukomento, untensils kag anti-personnel mine sa diin mahimo nga napatay ang nasambit nga rebelde sa engkwentro nga nagluntad sang Biyernes.
Kaina nga engkwentro sa nasambit man nga lugar, napilasan si Sergeant Johnny Labrador.
Suno kay Batara, indi matuod nga nagapang-harrass ang mga suldado kag ang mga nagasungka nga rebelde ang ila nga ginadakop kag ginapabulong naman ang mga nagkalapilasan bangud sa humanitarian reasons.
Ginpahayag ni Batara nga indi man mahinago nga ginahimo sang rebelde nga grupo nga human shield ang mga pumuluyo rason nga nagahalong man ang militar sa pagpatigayon sang manhunt operations.
Ginapatihan nga may nabilin pa nga 15 ka rebelde ang nagapanago sa Brgy. Ongyod nga bukid nga bahin sang Miag-ao.
Santo sa pagpangusisa, ang mga rebelde nga naka-engkwentro sang mga suldado ang kabahin sang Suyak Platoon-Komiteng Rehiyon Panay nga ginapamunu-an ni Joven Ceralvo alyas Ka Lex.Indi man malayo nga ang nasambit man nga grupo amo ang nagpangkakas sang poster sang isa ka pulitiko sa 1st district sa probinsya sang Iloilo santo sa nakuha nga footage sang Closed Circuit Television camera sa Brgy. San Jose sa banwa sang Miag-ao.
Padayon pa nga ginapangita sang Philippine Army ang pinuno sang Suyak Platoon-Komiteng Rehiyon Panay nga si Joven Ceralvo alyas Ka Lex.
Suno kay Batara, mabudlay dakpon si Ceralvo nga amo ang nagapatigayon sang extortion ukon pagpangilkil.
Magluwas diri, ginpahayag man ni Batara nga si Ceralvo ang nagapatigayon sang recruitment ilabi na sa mga minor de edad.
Sa subong suno kay Batara, indi lang niya matumod kun sa diin na si Ceralvo.
Ang kumpirmado lang amo nga nagapatigayon man sang kalakasan ang Suyak Platoon-Komiteng Rehiyon Panay sa San Jose de Buenavista, Antique.
