ILOILO CITY – Sa katapusan pa subong nga bulan madala pauli sa Pilipinas ang bangkay sang Pinay caregiver nga napatay sa magnitude 6.4 nga linog sa Hualien, Taiwan.
Suno kay Bombo Radyo international correspondent Catherine Bron Haboc sang Legazpi City apang karon nagatrabaho na sa Hualien, sarado karon ang mga ahensiya sa Taiwan bangud sang Chinese New Year rason nga naatrasar ang pagproseso sa bangkay ni Melody Albano Castro sang Abulug, Cagayan.
Nahaya karon sa Peng Kwan Funeral ang bangkay ni Castro nga ginbuksan para sa mga kaangay man sini nga Pinoy.
Suno kay Haboc nga isa sa mga nagduaw sa haya ni Castro, nagpatigayon sang misa kaina sang aga para sa Pinay.
Ginaproseso naman ang pagpadulong sang himata ni Castro sa Taiwan agud sugaton ang bangkay sini.
Samtang ginpahayag ni Haboc nga naghatag sang 100 Taiwan dollars nga bulig ang siyudad sang Hualien sa pamilya ni Castro samtang 500 hundred Taiwan dollars naman ang ginhatag sang mga Japanese nga amo sang Pinay worker.