LAMBUNAO, ILOILO – Ipaidalom sa autopsy examination ang bangkay sang preso nga napatay matapos naghikog sa sulod mismo sang presuhan sa Lambunao Municipal Police Station (MPS).
Ini amo si Alyas Jay-R sang Barangay Maite Pequeño, Lambunao, Iloilo kag nadakpan sa ginpatigayon nga sa drug buy-bust operation.
Sa interview sang Bombo Radyo kay Police Major Roy Tayona, hepe sang Lambunao Municipal Police Station, iya ginpahayag nga sila na mismo ang nagpanugyan sa pamilya sang biktima nga ipaidalom ini sa autopsy examination.
Nahibaluan nga nagbitay ang biktima sa diin gingamit sini ang habol nga ginhatag sang iya iloy sang adlaw nga nadakpan ini sa buy-bust operation.
Nahibaluan nga nagaisahanon lang ang biktima sa iya selda sang natabo ang insidente.
Apang antes sini, nagareklamo na nga daan ang subject nga nagalain ang iya pamatyag, rason nga gindala ini sa ospital.
Suno kay Tayona, natumod sang doktor nga mataas ang blood pressure sang biktima.
Matandaan nga nadakpan ang subject sang Dominggo, Setyembre 22, 2024 sa diin narekober sa iya poisyon ang P34,000 nga balor sang suspected shabu.
