ILOILO CITY – Nagahamyangon sa salog kag may tabon na nga ulunan sa guya sang nasapwan ang bangkay sang senior citizen sa sulod sang kaugalingon nga balay sa Brgy. Tacas, Jaro, Iloilo City.
Ang biktima ang ginkilala nga si Rosa Argel, 90 anyos.
Sa interview sang Bombo Radyo kay Espe Tabuada, kasilingan sang biktima, iya ginpahayag nga nagtawag sa iya ang hinablos ni Argel agud nga hibaluon ang kahimtangan sang iya tiya.
Suno kay Tabuada, iya nga gin-updan ang hinablos sa pagpadulong sa balay ni Argel kag sang ila ginlantaw sa bintana, ila na nakita nga nagakaya na ang bangkay sa salog.
Bangud sini, ginhungod na lang nila nga gub-on ang pwertahan agud nga makasulod sa balay.
Ginpahayag ni Tabuada nga kahapon nga adlaw, sirado ang balay sang biktima apang wala naman na-lock ang gate.
Suno naman kay Leah Peronce, apo sang biktima, posible nga may foul play sa kamatayon sang iya lola.
Ginpahayag ni Peronce, may yara sang hypertension ang iya lola apang kun balati-an lang ang rason sang kamatayon, makatilingalahan kun nga-a naga-ukay ang gamit sa sulod sang balay.
Indi pa man makumpirma kun bala may foul play sa krimen apang nagapati ang apo nga hungod nga ginpatay ang iya lola.
