ILOILO CITY – Nakapauli na sa iya pamilya ang bangkay sang Scout Ranger nga napatay sa nagapadayon nga kinagamo sa Marawi City.
Sakay sang C-130 plane, nag-abot sa Kalibo International Airport ang bangkay ni Sgt. Chris Lorezo, 27, tumandok sang Barangay Camansihan, Culasi, Antique.
Ini ang ginsug-alaw sang iya pamilya kag mga kakilala nga nag-upod man sa pagdul-ong sa bangkay sang suldado sa puluy-an sini.
Nahibaluan nga sang Mayo 23 lang ulihi nga nagpauli sa iya pamilya si Sgt. Lorenzo para magbakasyon.
Sang Hunyo 19 ini ang nagbalik sa serbisyo kag gilayon nga na-assign sa Marawi.
Si Sgt. Lorenzo ang ika-tatlo nga suldado nagikan sa Panay nga napatay sa kinagamo sa Marawi kun sa diin una diri si Private First Class Anthony Capulot sang Barangay Ayabang, Leon, Iloilo kag Sgt. Simeon Plares sang Ubang, Pototan, Iloilo.