Nasapwan nga naga-utaw-utaw sa suba kag yara na sa advanced state of decomposition ang bangkay sang isa ka tigulang nga babayi sa Barangay Tumcon Ilaud, Pototan, Iloilo.
Ang biktima amo si Cecilia Paligumba, 71, balo, kag residente sang Barangay Tuburan sa amo nga banwa.
Sa interview sang Bombo Radyo kay Police Major Ciriaco Esquilarga, hepe sang Pototan Municipal Police Station, iya ginpahayag nga sang nagligad nga Myerkules pa, Marso 16, sang ginapahayag nga naglayas si Paligumba halin sa ila nga puluy-an bangud ginaalegar nagsunggod ini sa iya nga kabataan.
Wala na nakapauli ang tigulang halin sang amo nga tion, kag napa-blotter naman ini sa police station.
Suno pa kay Esquilarga, antes ang insidente, makapila ka beses na ini nga mag-attempt nga maghikog.
Ginapahayag problemado ang biktima bangud may deperensya sa panghuna-huna ang iya kabataan.
Sang nasapwan ang biktima, kumbinsido ang pamilya nga wala sang foul play sa likod sang insidente, magluwas pa nga wala man sang indikasyon nga ginkuga ini ukon ginsakit antes nasapwan sa suba. ##
