ILOILO CITY – Gin abi-abi sang Estados Unidos ang mga lideres sang Finland kag Sweden bilang suporta sa ila bid nga magsulod sa North Atlantic Treaty Organization (NATO) agud nga mabatuan ang Russia sa padayon nga pagsalakay sa Ukraine.
Ginbaton ni US President Joe Biden sa isa ka red carpet kag military honor guard sanday Swedish Prime Minister Magdalena Andersson kag Finnish President Sauli Niinisto pila ka adlaw pagkatapos nga gin-anunsiyo nga mag-upod sa US-backed alliance.
Ang tatlo ka mga lideres ang nagsapol sa Oval Office.
Una na nga ginpahayag ni Biden nga suportado niya ang membership sang Sweden kag Finland sa ila alyansa.
Nagpasalig naman si Biden nga buligan ang duha ka pungsod kag magpabilin nga vigilante sa ano man nga pamahog samtang nga gina-konsiderar ang ila nga membership.
Sa pihak sang mabaskog nga suporta sang Estados Unidos, hugot naman nga ginabalagan ini sang Turkey kag gin-akusaran nga nagasuporta sa terorismo bangud sang presensya sang Kurdish militants.
Ang 30 ka mga myembro sang NATO ang kinahanglan nga magpasugot sa bid sang Sweden kag Finland.
