ILOILO CITY – Ginplastar sang Bangko Sentral ng Pilipinas ang pila ka priority bills para sa 19th Congress nga may katuyu-an nga mapasanyog ang banking sector kag agud nga masuportahan ang digital payments.
Suno kay Bangko Sentral ng Pilipinas governor Felipe Medalla, ang mga prayoridad amo ang pag-amyendar sa Bank Deposits Secrecy Bill, ang gina-propose nga Financial Accounts Regulation Act , ang SIM Registration Bill kag ang Digital Payments Bill.
Ang ginaduso nga pag-amyendar sa Bank Deposits Secrecy law ang may katuyu-an nga mapabaskog ang capacity sang banking system batuk sa tax evasion, money laundering kag iban pa nga financial crimes.
Samtang, ang Financial Accounts Regulation Act naman ang magapabaskog sang consumer protection kag maga-impose sang mas mataas nga penalidad para sa financial criminals .
Ini ang maga-regulate man sang paggamit sang bank accounts kag e-wallets agud nga malikawan ang mga illegal acts.
Suno pa sa central bank, ginaduso man ang pagpasar sang Digital Payments Bill nga mangin giya para sa safe, affordable kag efficient nga paggamit sang digital payments sa financial transactions sa gobyerno.
Ginaduso man ang SIM registration bill nga may katuyu-an nga malikawan ang SMS-linked crimes, bank fraud kag text scams.
Ang ini nga hagna ang aprubado na sang duha ka chamber sang Congress kag nagahulat na lang sang approval sang presidente.
