Nag-resign na gid man kag naghalin na sa Bangladesh si Prime Minister Sheikh Hasina Wazed kasunod sang sinemana na nga protesta sang mga estudyante nga nagdangat sa maduguon na nga kinagamo sa amo nga pungsod diri sa Asya.
Base sa reports, nagbiya padulong sa India ang 76-anyos nga lider sakay sa helicopter matapos nga ginsulong sang protesters ang iya balay sa Dhaka.
Ini ang ginakabig nga pagtakop sang pagginahum ni Hasina nga amo ang longest-serving PM sang Bangladesh halin sang nagpungko ini sang 2009.
Suno kay Bangladesh army chief Gen. Waker-uz-Zaman, magatukod ang militar sang interim government kasunod sang amo nga development sa gobyerno.
Nagpasalig man ini nga indi magpangluthang ang militar kag pulis kag nagpanawagan sa publiko nga likawan na ang kalakasan
Sang Domingo, matandaan nga 91 ang napatay kag ginatos ang nasamaran bangud sa gamo sa tunga sang pulis kag protesters bangud sa demand nga ibasura na ang quota sa trabaho kag sa gobyerno dala na ang panawagan nga maglayas na ang prime minister.
Ang amo nga death toll sang Domingo lakip ang 13 ka mga pulis amo ang pinakamataas sa sulod sang isa ka adlaw — base ina sa recent history sang bisan diin nga pungsod nga may yara sang nagakatabo nga protesta.
