GUIMARAS – Madamo na nga bes nga nagpang-harass ang mga illegal fishers nga nagasulod kag nagapangisda sa municipal waters nga sakop sang Nueva Valencia, Guimaras.
Sa interview sang Bombo Radyo kay Mayor Emmanuel Galila, iya ginpahayag nga may eksperyensya man sadto ang Bantay Dagat nga ginsalakay man kag gintapakan sang fishing vessel sang iligal nga mga manugpangisda.
Suno kay Galila, nagapatigayon sang sea patrol operation ang Bantay Dagat bangud otorisado sila sa pagpangdakop apang indi sila armado.
Sang una suno sa alkalde, sa ila daan nga practice, may mga pulis man nga nagaupod sa operasyon apang bangud sa pagbaylo-baylo sa administrasyon kag duty time sang mga pulis, nagamato-mato na lang subong ang Bantay Dagat.
Una na nga nagpahayag si Commander Edison Diaz, chief sang Philippine Coast Guard- Iloilo kag nagaserbe man nga officer-in-charge sa PCG Guimaras, nga kuntani, antes himuon ang sea patrol, may coordination anay nga himuon sa PCG.
Suno naman kay Galila, mas maayo gid kun maupdan sila sang PCG bangud madamo ang illegal fishers nga nagabantay sa dagat kun gab-i.
Sa bahin naman sang kamatayon sang Bantay Dagat Member nga si Nelson Bordon nga ginapahayag gin-harass sang illegal fishers nga taga-Negros Occidental, nagpahayag si Galila nga magabulig ang LGU agud mapalubong sang disente ang biktima. Nagpasalig man si Galila nga magabulig man sila agud mapasabat ang mga tawo nga responsable sa kamatayon ni Bordon.
