Nasamaran sa agtang ang isa ka bantay sang pasyente sa Rep. Pedro Trono Memorial District Hospital sa Guimbal, Iloilo matapos aksidente nga napalupok sang gwardiya ang iya armas.
Sa interview sang Bombo Radyo Iloilo kay Police Captain Alberto Manguilimotan Jr., officer in charge sang Guimbal Municipal Police Station, iya ginpahayag nga maga-umpisa na kuntani sa duty ang gwardiya gani nga gin-check sini ang armas.
Suno kay Manguilimotan, indi ang mismo bala ang nag-igu sa babaye duha ka metros ang kalayuon halin sa guard kundi ang tiles nga nag-agsik bangud sa salog nag-igo ang bala.
Magluwas diri, naigu man sang agsik sang tiles ang tiil sang gwardiya.
Gilayon nga gindapatan sang nagakaigu nga pagbulong ang biktima sa amo man nga ospital kag subong yara na sa maayo nga kahimtangan.
Gindala sa kustodiya sang Guimbal MPS ang gwardiya kag ginahulat na lang ang biktima kun mapasaka ini sang panumbungon.
