ILOILO CITY – Ginakabig nga pagpanghangkat ni Mayor Mariano Malones sang Maasin, Iloilo ang natalana nga pagdeklara subong nga adlaw sang Philippine Drug Enforcement Agency (PDEA) sa iya banwa bilang drug free municipality.
Sa interview sang Bombo Radyo, ginpahayag sang alkalde nga nagpanikasog sila agud limpyuhan sa iligal nga droga ang ila banwa kag nagbulig man ang mga pumuluyo.
Ginakabig naman ni Malones nga pagpanghangkat kun paano mapabilin nga drug free ang iya banwa.
Sugod subong nga adlaw suno sa alkalde, hugtan pa nila ang pagbantay agud indi na makasulod ang iligal nga droga sa Maasin.
Si Mayor Malones ang isa sa mga ginhingadlan ni Presidente Rodrigo Duterte nga narco-politician sa Iloilo bangud isa kuno ini ka illegal drug protector.
Suno sa alkalde, wala man siya gin-imbestigaran apang dako ang nangin epekto sa iya pamilya sang ginhimo sang presidente.
Para naman kay Iloilo Governor Arthur Defensor Sr., paglimpyo sa imahe sang alkalde ang pagdeklara sa banwa sang Maasin nga hilway na sa droga.
Madamo na sang gin-antos si Mayor Malones suno sa gobernador, sumugod sang hingadlan ni Presidente Duterte nga drug protector.
Pamatuod man ini suno sa gobernador nga sinsero ang alkalde sa kampanya batok sa iligal nga droga.