𝗗𝗨𝗠𝗔𝗡𝗚𝗔𝗦, 𝗜𝗟𝗢𝗜𝗟𝗢 — Gin-athag sang Local Government Unit (LGU) sang Dumangas, Iloilo nga wala sang nadula nga kwarta kaangot sa P63 million nga share sang Philippine Ports Authority (PPA) para sa Dumangas Port.
Sa interview sang Bombo Radyo kay Atty. Lady Hope Gallenero, Municipal Administrator sang Dumangas, iya ginpahayag nga ang kwarta halin Dumangas Port nga nakolekta ang may target nga sharing sa Philippine Ports Authority, apang, mahimo lamang nga ma-share ini kon ma-finalize ang Memorandum of Agreement (MOA).
Suno kay Gallenero, ang kwarta ara lang sa ila kag ginhimo-an sang mga bank accounts agud nga matago samtang wala pa napirmahan ang Memorandum of Agreement nga magapahanugot nga mahatag ang P63 million nga share.
Gin-athag man sini nga ang Memorandum of Agreement ang madugay na nga ginsumite sang banwa sa Philippine Ports Authority agud mapirmahan kag maimplementar, rason man nga naghimo ang Sangguniang Bayan sang Dumangas sang resolusyon nga nagapahanugot nga pirmahan ni Dumangas, Iloilo Mayor Braeden John ‘BJ’ Biron.
Apang, tubtob subong, wala sa gihapon ini napirmahan sang Philippine Ports Authority.
Ginpahayag man sini nga sa tion nga mapirmahan ang Memorandum of Agreement, ang banwa ang gilayon handa nga magpaguwa sang nasambit nga balor sang kwarta.
Nagpasalig man ang natungdan nga proud kag confident ang accounting sang banwa sang Dumangas nga transparent sa mga pumuluyo ang kaban ng bayan.
Nahibaluan nga santo sa Commission on Audit (COA) Rules and Regulations, makapagwa lamang sang kwarta ang isa ka government agency kon may legal nga basehan.
