GUIMBAL, ILOILO – Ginpaidalom na sa Heightened and Enhanced Quarantine ang banwa sang Guimbal, Iloilo kasunod sang ika-tatlo nga kaso sang Coronavirus Disease.
Sa interview sang Bombo Radyo kay anay Iloilo 1st District Representative Richard Garin, iya ginpahayag nga ginpaidalom na sa Heightened and Enhanced Quarantine ang Guimbal–buot silingon, mas ginhugot ang mga pagsulundan nga ginapatuman.
Gin athag ni Garin nga indi lockdown ang ginahimo sang banwa.
Suno kay Garin, ang ginapahanugutan lang nga makaguwa sa balay amo ang may mga quarantine pass sa diin isa lang per household ang may yara.
Maid-id man ang contact tracing nga ginahimo kag kun sin-o man ang naka direct contact sang pasyente nga nagpositibo sa COVID-19 ang gilayon nga i-test bangud indi lang ang may mga sintomas ang mahimo nga mangin positibo kundi amo man ang wala sang sintomas.
Nagahingyo man ang natungdan sa publiko nga indi pag i-discriminate ang mga kabanwahanan nga may kaso sang COVID-19.
Samtang nagpangabay man si Garin sa Iloilo Provincial Government nga sa baylo ang Dr. Ricardo Y. Ladrido Memorial District Hospital, himuon na lang kuntani ang bag-o nga building sang San Joaquin Hospital nga mangin PUI center.
