Pagabuligan sang Municipality of Miagao ang 28 tanan ka mga Badjao nga matigayon nga makapauli sa ila nga lugar sa Zamboanga.
Ini matapos nga natrap ang mga ini kaina sang kaagahon sa idalom sang Tumagbok River, Miag-ao, Iloilo matapos ang pagtaas sang tubig bangud sang mamunog nga pag-ulan nga dala sang Bagyo Inday.
Sa interview sang Bombo Radyo kay Miagao Mayor Richard Garin, iya ginpahayag nga sang nagpatigayon sang rescue operation ang mga awtoridad, nakit-an na lang nga nagakurog ang pila ka mga kabataan bangud sa pagkabasa sang mga ini.
Gilayon naman nga ginhatagan ang mga ini sang nagakaigo nga mga pag-atipan samtang yara ang mga ini sa evacuation center.
Gindala anay ang mga ini sa first aide clinic sang banwa agud mabuligan ang ila kahimtangan kag gilayon nga gin-transfer man ang mga ini sa Regional Evacuation Center para sa temporaryo nga matiniran sang mga ini.
Suno sa alkalde, naglab-ot na sa isa ka bulan nga nagatinir ang grupo sa idalom sang taytay kun sa diin nadiskobrehan nga una magamay pa lamang ang mga ini apang sang nagdugay nagdugang na ang ila nga numero.
Nahibaluan nga natigayon nga maluwas ang 11 tanan ka mga kabataan kag 17 ka mga tigulang.
Dugang pa ni Garin, naga-koordinar naman ang Municipality of Miagao sa nagakaigo nga mga ahensya agud mapapauli ang mga Badjao sa ila lugar sa Zamboanga.
