Ginpabaskog pa sang banwa sang Pototan ang ila mga preparasyon agud masiguro ang kahandaan sang komunidad sa tion sang mga emerhensya, ilabi na kun may ara sang bagyo ukon iban pa nga kalamidad nga magluntad sa ila nga lugar.
Ini kasunod sang pag-qualify sang banwa sa mga criteria sang Republic Act No. 10121, nga nagahatag sang kahigayunan sa Local Government nga magdeklara sang State of Calamity kon 15% na ang populasyon nga naapektuhan sang isa ka kalamidad.
Sa interview sang Bombo Radyo kay Mayor Adi P. Lazaro, Municipal Mayor sang Pototan, iya ginpahayag nga naglab-ot na sa 3,615 ka residente halin sa 31 ka barangay ang naapektuhan sa nagligad nga kalamidad ukon Bagyo Inday.
Base sa inisyal nga assessment, naglab-ot sa P750,000 ang ginabanta nga halit sang nasambit nga kalamidad sa imprastraktura samtang naglab-ot naman sa P3 milyon ang danyos sa sektor sang agrikultura.
Naga-coordinate naman ang LGU sang nasambit nga banwa sa Provincial Disaster Risk Reduction and Management Office (PDRRMO) kag Municipal Social Welfare and Development Office (MSWDO) agud masiguro ang nagakaigo nga bulig kag response para sa mga naapektuhan.
Dugang pa ni Mayor Lazaro, may yara na sang mga warning signal, sensors kag iban pa nga kagamitan ang banwa agud mabantayan ang pagsaka sang tubig kag madali nga makahatag sang paandam sa publiko kon may nagahilapit nga bagyo ukon pagbaha.
Ginpabutyag man sang alkalde nga padayon ang paghatag sang mga training sa tagsa ka barangay agud mapabaskog ang ila ihibalo kag kahandaan sa nagkalainlain nga sitwasyon ilabi na kun may magluntad nga kalamidad sa amo nga banwa.
