TIGBAUAN, ILOILO– Ginadumilian ang pagsulod sang mga tawo nga wala sang importante nga transaksyon sa banwa sang Tigbauan bangud sa pamahog sang coronavirus disease 2019.
Sa interview sang Bombo Radyo kay Tigbauan Mayor Suzette Alquisada, iya ginpahayag nga sa subong, ginapaiway ang pagpatigayun sang birthday celebrations kag iban pa nga mga pagtililipon, bilang preventive measures kag paghalong sa ikaayong lawas sang tagsa ka pumuluyo.
Pahayag pa ni Alquisada, kanselado man ang dalgako nga market day sa banwa, apang magapabilin nga bukas ang merkado para sa mga pang-adlaw-adlaw nga kinahanglanon sang mga pumuluyo.
Ginadumilian man suno kay Alquisada ang pagpaninda sang mga senior cittizens bangud sila ang makabig ‘vulnerable’ sa virus.
Dugang pa sang natungdan, hugot ang ginapatuman nga border restrictions sa diin, may yara sang checkpoints sa entry kag exit points sang banwa.
