Bisan manugbata kag nagapasakit, gintapos gid sang isa ka bar examinee ang katapusan nga adlaw sang examination sa Central Philippine University sa Iloilo City.
Ang examinee amo si Melyssa Albaran, tumandok sang Roxas City, Capiz.
Sa interview sang Bombo Radyo kay Atty. Joey Mondero, Bar Exam Proctor, iya ginpahayag nga dalayawon gid ang ginpakita nga kabakod ni Albaran bangud indi mahapos ang exam kag pat-od nga indi man mahapos ang mag-labor.
Suno kay Mondero, samtang ginatapos sang babaye ang bar examination, may nagahulat man sa iya nga ambulansya.
Pagkatapos sang exam, gindala si Albaran sa isa ka ospital sa Roxas City, Capiz kun sa diin niya ginbun-ag ang iya healthy baby boy.
