ILOILO CITY – Ginkalipay sang Bar Owners kag Operators ang pagbawi sang Liquor Ban sa syudad sang Iloilo.
Sa interview sang Bombo Radyo kay Jim Velez, presidente sang Smallville-Boardwalk Business Association, Inc., iya ginpahayag nga pabor para sa ila nga mga negosyante ang nasambit nga lihok ni Iloilo City Mayor Jerry Treñas.
Suno kay Velez, ang night life ang isa sa mga ginadagsa sang tawo sa syudad sang Iloilo kag makabulig sa ekonomiya sang lugar.
Ginpahayag ni Velez nga nagadamu lang ang tawo sa mga bar kag clubs sa tion sang 10:00 tubtub tungang gab-i kag nagadamu pa gid sa tion sang kaagahon.
Kun may yara sang Liquor Ban paglampas sang 2:00 sang kaagahon, ginpahayag ni Velez nga indi mag-enjoy ang mga customer bangud nga nagadali sila nga mag-inom kag magpauli.
Magluwas diri, ginpahayag man sang natungdan nga daku man ang buhin sa benta sang tagsa ka mga commercial establishment bangud nga sirado na ang negosyo paglampas sang gintalana nga oras.
Bangud nga ginahulat na lang ang pirma ni Treñas agud nga madula ang Liquor Ban, ginpahayag sang natungdan nga daku ini nga pabor para sa mga negosyante kag para sa mga mahuyugon sa night life.
