ILOILO CITY – Magasunod ang tanan nga Bar Owners kag Operators sa pagsulundan nga ipatuman ni Iloilo City Mayor Jerry Treñas may kaangtanan sa pagbawi sang Liquor Ban sa syudad sang Iloilo.
Sa interview sang Bombo Radyo kay Jim Velez, presidente sang Smallville-Boardwalk Business Association, Inc., iya ginpahayag nga tanan nga Bar Owners kag Operators ang nagpabor sa One Strike Policy nga luyag ipatuman ni Treñas.
Suno kay Velez, kinahanglan nga sundon gid ang pagsulundan bangud nga sa isa lang ka violation, igapasirado sang alkalde ang negosyo.
May kaangtanan diri, ginpahayag sang natungdan nga indi pagbaligyaan sang makahulubog nga ilimnon ang mga menor de edad kag kun may yara sang duda, pangitaan sang Identification Card ang isa ka customer.
Magluwas diri, mas makapaayo man suno kay Velez nga may yara sang hugot nga security protocol ang isa ka commercial establishment para sa seguridad sang tanan.
