Ginpa-Bombo kag ginpanawagan sang mga vendors sang Iloilo Terminal Market ukon Super nga pasuyopan na ukon ide-clog sang syudad sang Iloilo ang mga drainages sa palibot sang merkado.
Ini pagkatapos nga indi lang sa portion sang Rizal St. malapit sa bath house nagahalin ang indi maagwantahan nga baho kundi pati na Mabini Wing sang merkado.
Suno kay Punong Barangay Boodie Delariarte, Presidente sang mga vendors sa Super, ginalikawan nalang sang mga umalagi kag publiko ang area tungod sang makabulutod-tiyan kag makatulukal-asthma nga baho.
Naghimo na sang temporaryo nga tulay ang mga vendors tungod padayon ang pag-ilig sang may kolor nga tubig nga may indi maagwantahan nga baho nga nagahalit naman sa mga umalagi kag mga nagabligya sa lugar.
Ginpalab-ot gilayon sang Bombo Radyo mismo kay Mayor Jed Patrick Mabilog ang concern sa diin ginpasalig sang alkalde nga maski holiday subong nga adlaw, pakadtuan sini sang taga City Engineers Office kag City Environment and Natural Resources Office ang lugar kag ipa de-clog ang mga barado nga mga kanal sa palibot sang merkado publiko.
