Gindeklarar na nga drug-cleared ang Barangay Dungon B sa distrito sang Jaro matapos mag-graduate sa drug rehabilitation ang mga indibidwal nga yara sa ila Barangay Anti-Drug Abuse Council ukon BADAC list.
Isa ang Dungon B, Jaro sa bago nga 14 ka barangay nga nagdugang sa listahan sang drug cleared barangay sa syudad sang Iloilo.
Ang 13 naman ka barangay nga nalakip sa dugang nga drug cleared barangay amo ang General Hughes kag Tanza Baybay sa distrito sang City Proper; Lopez Jaena Norte sa La Paz; Balantang, Calubihan, Fajardo, San Vicente, Ungka, kag Tagbac sa Jaro; East Timawa kag Kasing-Kasing sa Molo; kag Brgy. Navais kag Tabucan sa distrito sang Mandurriao.
Sa interview sang Bombo Radyo kay Punong Barangay Hydee Mabaga sang Dungon B, Jaro, Iloilo City, iya ginpahayag nga 16 ka indibidwal ang yara sa ila BADAC list kun sa diin 15 sa ila ang nakumpleto kag naggradwar na sa ila nga mga rehabilitation, samtang ang isa naman ang nagtaliwan.
Suno kay PB Mapaga, nangin daku nga bulig ang kooperasyon sang mga indibidwal, ila pamilya kag komunidad agud makompleto ang mga kinahanglanon sa drug rehabilitation.
Pahayag niya, naghatag man ang barangay sang suporta, lakip ang gamay nga allowance sa mga kinahanglan mag-absent sa obra ukon magbiyahe para sa ila rehabilitation.
Ginpahayag man sang kapitan nga dugay na nga ginalauman sang Barangay Dungon B nga ma-declare bilang isa ka drug-cleared barangay kun sa diin una na ini nag-apply sang 2017, sang siya pa ang barangay kagawad.
Apang, nagdugay ang proseso bangud may mga dokumento kag rehabilitation requirements nga wala gilayon nga makompleto sang iban.
Gin-athag man sini nga bisan drug-cleared na ang ila nga barangay, indi ini nagakahulugan nga wala na gid sang posibilidad nga may mag-engage liwat sa illegal nga droga rason nga ginapanawagan niya ang kooperasyon sang mga residente kag pag-report sa barangay kon may nahibaluan nga nagabalik sa amo nga bisyo.
Dugang pa ni PB Mabaga, kinahanglan padayon ang pag-monitor kag pagbuligay sang barangay, pamilya kag komunidad agud mapabilin ang drug-cleared status sang Brgy. Dungon B, Jaro.
