Ginausisa sa subong nga himuon nga parking area ang barangay gym sa Brgy. Alalasan, Distrito sang Lapuz, bangud sang padayon nga pagdamo sang mga traysikad kag tricycle nga naga-agi kag naga-parking sa palibot sang lugar.
Ini nga mga salakyan ginakabig nga nagapugok kag nagaginutok sa dalan, nga nagadul-ong sang seryoso nga traffic congestion, ilabi na subong nga may proyekto ang DPWH sa nasambit nga karsada.
Sa interview sang Bombo Radyo kay Punong Barangay Jofel Ladiet, ginpahayag niya nga ang mayor nga problema sa ila barangay amo ang pagparking nga wala sang sistema sang mga salakyan sa duha ka kilid sang dalan.
Suno sa iya, ini nagadugang pa gid sang kabudlay sa paglabay sang mga tawo kag salakyan, labi na subong nga may ongoing nga konstruksyon sa lugar.
Ginsugid pa ni PB Ladiet nga nagsuggest siya kay Retired PCol. Uldarico Garbanzos nga, tungod nga national road ini, dapat wala sang may magpark nga e-trayk, tricycle, motorcycle kag 4-wheels sa kilid sang dalan.
Apang ginpaathag man niya nga ang palangabuhian sang kadam-an nga residente sa Brgy. Alalasan nagasandig sa pagbiyahe sang tricycle, gani nagapangayo siya sang konsiderasyon nga ma-allow ang one-side parking para sa 3-wheel vehicles lang.
Ginpasiguro man ni PB Ladiet nga ginakonsiderar nila ang covered area sang gym, apang gin-ako niya nga indi gid sini ma-accommodate ang tanan nga salakyan, kag limitado lang ini para sa mga traysikad kag tricycle.
Ginpahayag naman sang isa ka driver nga pabor siya nga gamiton bilang parkingan ang barangay gym para sa mga traysikad kag tricycle.
Sa interview sang Bombo Radyo kay Alex Tinder, isa ka driver, ginpabutyag niya nga mas maayo kuno nga gamiton ang gym bilang parking area agud magligwa man ang dalan kag mangin hapos ang pag-agi sang mga tawo kag salakyan.
Suno sa iya, makabulig ini sa pagpaayo sang traffic flow kag malikawan ang pagginutok sa karsada.
(Reported by Bombo Bryan Gonzales, with Anchor Bombo Donnie Degala, via Bombo Reports 2nd edition)
