ILOILO – Gin-activate ang task force sa banwa sang Cabatuan nga amo ang magatutok sa liwat nga pagpatigayon sang road clearing operations.
Sa interview sang Bombo Radyo kay Mayor Ronilo Caspe, iya ginpahayag nga nagapanguna nga problema sa ila nga banwa amo ang mga barangay halls, waiting sheds, kag tanod outposts nga yara mismo natukod sa kilid sang dalan.
Walo sa 11 ka mga barangay sa banwa suno sa alkalde ang naga-obstruct sa dalan kag amat-amat naman nga naguba ang iban apang may yara man sang iban nga ginapangitaan pa sang sayluhan nga lugar.
Gin-utdan lang anay suno sa iya ang atop kag iban pa nga structures nga nagasablag sa sidewalk.
Nahibaluan nga low tubtub medium ang compliance rating sang ila nga banwa sang una nga hugnat sang road clearing operations sang 2019 kag amo ini ang ginatinguhaan nga mapauswag subong.
Ang road clearing operations nga ginmandu ni Department of the Interior and Local Government Secretary Eduardo Año paagi sa Memorandum 2020-145 ang magaumpisa sa Lunes, Nobyembre 16, kag full implementation ini sa mga lugar nga naka-modified general community quarantine (MGCQ) kaangay sang probinsya sang Iloilo.
