ILOILO CITY – Wala sang lockdown nga natabo kaina sang hapon sa Iloilo City Hall kasunod sang deklarasyon ni Iloilo City Mayor Jerry Treñas nga half day lang ang trabaho sang mga empleyado.
Matandaan nga santo sa deklarasyon ni Treñas, half day lamang ang trabaho kaina sang hapon agud nga hatagan sang ligwa ang pag-disinfect sa bug-os nga building.
Ini bangud nga may yara sang mga wala ginhingadlan nga empleyado nga may yara sang close contact sa Persons Under Monitoring.
Buwas nga adlaw, balik na sa trabaho ang mga empleyado sang Iloilo City Hall.
Samtang, 100% naman nga activated ang mga Barangay Health Emergency Response Team kasunod sang Memorandum Circular 2020-18 ni Department of Interior and Local Government Sec. Eduardo Año.
Sa interview sang Bombo Radyo kay Roy Defiño, Director sang Department of Interior and Local Government- Iloilo City, iya ginpahayag nga activated ang Barangay Health Emergency Response Team sa 180 ka barangay sa syudad sang Iloilo.
Ang Barangay Health Emergency Response Team suno kay Defiño ang ginalakipan sang Punong Barangay, Barangay Tanod kag duha ka Barangay Health Worker.
Sa iban nga barangay suno kay Defiño, ginadugangan nila ang miyembro sang Barangay Health Emergency Response Team ilabi na ang mga may yara sang background sa patag sang science.
Ginmandu naman sang ahensya ang pag-reschedule sang Barangay Assembly agud nga malikawan ang paglapta sang Coronavirus Disease 2019 (COVID-19).
Gin-athag ni Defiño nga wala sang suspension kundi halinon lamang ang petsa sang pagpatigayon sang Barangay Assembly kasunod sang ginpaguwa nga guidelines ni Sec. Año.
Ang nasambit nga guidelines suno kay Defiño ang kasunod sang deklarasyon ni Pres. Rodrigo Duterte nga ipaidalom sa State of Public Health Emergency ang pungsod bangud sa nagadamo nga pasyente nga nalatnan sang virus.
