BALASAN, ILOILO – Nagpabutyag sang hibubun-ot kag pagkadismaya ang isa ka Barangay Kagawad matapos gindali-dali ang pagpalubong sa iya bana nga gindudahan nga COVID-19 positive nga sang ulihi nakumpirma nga negatibo sa virus.
Sa exclsuive interview sang Bombo Radyo kay Brgy. Kagawad Joyrena Betsaida sang Lawis, Balasan, Iloilo, iya ginpahayag nga sang Agosto 26, ginpahibalo siya sang ila Punong Barangay nga indi sila anay magguwa sa balay bangud nga ginadudahan nga may COVID-19 ang iya nagamasakit nga bana.
Pagkasunod nga adlaw suno kay Betsaida, ginpadulungan sila sang mga Barangay Health Worker para sa monitoring kag pagkagab-i, gin-ubo ang iya bana kag nagsuka na sang dugo.
Bangud sini, gindala sa district hospital sa Balasan ang iya bana apang bangud nga may yara sang problema sa baga, ginpakamaayo sang doktor nga i-refer na lang sa syudad sang Iloilo ang pasyente.
Ginpahayag ni Betsaida nga madamo sila sang hospital nga gintawgan apang lunsay nagpamalibad sa rason nga wala na sang available nga hospital bed kag bangud sini, mas ginpili niya nga magpasimpalad kag ipa-admit ang iya bana bilang walk-in patient.
Pasado 1:00 sang kaagahon sang Agosto 28 sang gintawgan niya ang Punong Barangay sang ila lugar agud magpangayo sang bulig may kaangtanan sa pagasakyan nga ambulansya apang bangud sa pila ka sirkumstansya, pasado 5:00 na sang kaagahon sang nag-abot ang salakyan.
Sa Barotac Viejo pa lang suno kay Betsaida, ginbawi-an na sang kabuhi ang iya bana apang agud nga makasiguro, naghapit sila sa district hospital sang nasambit nga banwa agud ipadeklarar sa doktor.
Nadesisyunan niya suno kay Betsaida nga ibalik sa district hospital sang Balasan ang bangkay agud kuhaan sang swab sample para sa COVID-19 test.
Sang gindala na sa punerarya ang bangkay, ginpahayag ni Betsaida nga nag-abot man ang Rural Health Physician sang Balasan kag ginpahibalo sila nga kinahanglan nga ilubong gilayon ang iya bana bilang pagsunod sa protocol kag ila man ini nga ginsunod.
Sa subong suno kay Betsaida, naka-home quarantine sila sang iya mga anak samtang ginahulat ang ila COVID-19 test result matapos ginkuhaan sang swab sample sang Setyembre 2.
Ang pinaka-masakit suno sa natungdan amo nga sang Setyembre 14 lang sang nakumpirma nga COVID-19 negative ang iya bana apang tuman nga kabudlay kag diskriminasyon ang naagyan sang bug-os nga pamilya.
