ILOILO CITY – Nagapangayo sang pagpaathag ang isa ka barangay kagawad matapos ginaalegar ginbalibaran nga pasudlon sa isa ka pribado nga ospital ang kaupod niya nga barangay official apisar isa ka emerhensya ang kaso.
Sa interview sang Bombo Radyo kay Barangay Kagawad Clifford Espinosa sang Barangay East Timawa, Molo, iya ginpahayag nga gindali-dali nila dala sa Iloilo Doctors’ Hospital Inc. ang isa niya ka kaupod nga si Barangay Kagawad Jovie Amante matapos na-heat stroke sang Setyembre 6.
Suno kay Espinosa, sang yara na sila sa ospital, ginpahulat sila anay para sa temperature check kag iban pa nga health protocol.
Sang ulihi suno sa natungdan, may isa ka personnel nga nagpahayag nga kun mahimo, masaylo na lang sila sa iban nga ospital ‘bangud wala na sang doctor.’
“Wala kuno doctor kay on duty pa! Te emerhensya to ang dala ko. Kadaku nga ospital, wala doktor?”
Aminado ang natungdan nga wala na niya natalupangdan kun sin-o ang nag-istorya sa iya nga personnel sang ospital bangud nagpanic na siya bangud sa kondisyon sang iya kaupod nga kagawad.
Gindala niya ang iya kaupod sa isa pa ka pribado nga ospital sa distrito sang Mandurriao kun sa diin ginpauna sila sa pila.#
(Ginatinguhaan pa sang Bombo Radyo nga kuhaan sang pahayag ang natungdan nga ospital may kaangtanan sa sini nga alegasyon sang barangay official.)
